Арчада Рамил Курамшин исемендәге X Төбәкара баянчылар, гармунчылар бәйгесе һәм «Уйнагыз, гармуннар!» фестивале узды

Арчада шушы көннәрдә Татарстанның халык артисты, виртуоз баянчы һәм композитор Рамил Курамшин исемендәге X төбәкара баянчылар, гармунчылар бәйгесе һәм «Уйнагыз, гармуннар!» фестивале узды. Чараларда төрле төбәкләрдән килгән кунаклар һәм катнашучылар, шулай ук милли музыкаль традицияләрне танытучы иҗат әһелләре катнашты.

Рамил Курамшин исемендәге бәйгенең Арча районында инде унынчы тапкыр узуы аның әһәмияте турында сөйли. Рамил Курамшин татар баян музыкасын үстерүгә зур өлеш керткән шәхес. Аның баян өчен язылган күпсанлы әсәрләре бүген дә музыка мәктәпләрендә һәм мәдәният йортларында уйнала.

Фестиваль сәхнәсендә Арча, Балтач, Кукмара, Теләче, Балык Бистәсе, Биектау, Әтнә районнарыннан, шулай ук Казан, Киров, Йошкар-Ола шәһәрләреннән һәм Башкортстан Республикасыннан килгән катнашучылар чыгыш ясады.

Фестивальнең Гран-при иясе дип Казан шәһәреннән Азат Фирдус улы Җәләлиев табылды.

Оештыручылар татар музыкаль мәдәниятен, милли традицияләрне, туган телне һәм җыр мирасын саклауга һәм үстерүгә өлеш кертүчеләрнең барысына да рәхмәт белдерәләр. Гармун һәм баян моңнары буыннарны һәм төбәкләрне берләштереп, алга таба да яңгырасын иде, дип тели арчалылар.