«ӘтнәТуй» фольклор фестивалендә туй гореф-гадәтләре белән таныштырдылар

1 август көнне Әтнә районында III «ӘтнәТуй» ачык фольклор-этник фестивале узды. Фестивальнең төп максаты – Казан артындагы татар туй йолаларын саклау, шулай ук туй тантанасы белән бәйле гореф-гадәтләрне торгызу һәм популярлаштыру.

«Хәзер күпчелек туйлар заманча уза, аларның асылы югалып бара. Элек кияү егетен кызыл тасмалар белән туктатып биетәләр иде, хәзер анысы да бик сирәк күренеш. Әлеге фестиваль ярдәмендә туй белән бәйле йолаларны халыкка җиткерәсебез килде», – дип сөйләде фестивальнең максатлары турында Әтнә район Мәдәният йорты директоры Инзилә Бариева.

Чара Олы Әтнә авылының «Туган ягым» мәдәният һәм ял паркында узды. Быел фестивальдә республикабызның биш төбәгеннән – Әтнә, Арча, Балтач, Биектау, Балык Бистәсе районнары фольклор коллективлары катнашты. Алар үз җирлекләренә хас туй йолаларын тәкъдим итте.

Балтач районының «Чишмә» фольклор коллективы кыз күңеленең кагылгысызлыгын үзендә чагылдырган «Кыз ярәшү» күренешен күрсәтте. Арча районының «Хәзинә» фольклор коллективы җитдилек һәм зәвык белән сугарылган «Кыз сорау (яучылык)» йоласын сәхнәләштерде. Әтнә районының «Чишмә» халык фольклор ансамбле татар йортының бәрәкәтен һәм байлыгын күрсәтүче «Бирнә сандыгы тутыру» мизгелләрен тасфирлады, ә данлыклы «Сөмбел» халык фольклор ансамбле «Киленгә су юлы күрсәтү» күренеше белән таныштырды. Балык Бистәсе районының «Талир тәңкәләр» фольклор коллективы гаилә җылылыгын гәүдәләндергән «Өй киендерү» йоласын тәкъдим итте. «Биектау» коллективы борынгы парлы тормышның чисталык һәм сафлык бәйрәме булган «Кияү мунчасы» күренешен җанландырды.

«Әтнә Туй» фестивалендә берничә мәйданчык эшләде. Анда өйләнешкән парларның архив туй фотосурәтләре белән дә, туй күлмәкләреннән торган күргәзмә белән дә танышырга мөмкин иде. «Гаилә» мәчете имам-хатыйбы Рөстәм хәзрәт Хәйруллин «Гаилә хакы. Гаиләдә кем хаклы» дип аталган әхлак дәресе үткәрде. Һәркем Әтнә ягына хас туй ризыклары – әлбә, кияү пәрәмәче һәм паштеттан авыз итте. Фестиваль кысаларында «Уңган килен» бәйгесе дә узда

«ӘтнәТуй» ачык фольклор-этник фестиваленең концерт программасында Россиянең һәм Татарстанның халык артисты Венера Ганиева, Татарстанның атказанган артистлары Алсу Хәбибуллина, Булат Шәрипов, Илгиз Зәкиев, шулай ук «Риваять» этнотөркеме, ABIEM PROJECT коллективы чыгыш ясады.