«Милли кунакханә»дә Галимҗан Барудиның «Мөхәммәдия» мәдрәсәсендәге музен оештыручы Разия Сәхипова

Шушы көннәрдә башкалабыз Казан тагын бер музейга артты. Олуг галим, педагог, җәмәгать эшлеклесе һәм сәясәтче булган Галимҗан Барудиның «Мөхәммәдия» мәдрәсәсендәге музее ул.

Баруди XIX-XX гасырлар чигендә татар милләтенең даһи бер лидеры дип танылырга хаклы. Мөселманнар арасында олы абруй казанган татар улы шәхес буларак та һәр чор өчен кызыклы.

1882 елда Галимҗанның әтисе киләчәктә «Мөхәммәдия» дип аталачак мәдрәсәне төзи. Әлеге уку йортын Галимҗан Баруди үзе җитәкли. Шуңа да музейның нәкъ менә мәдрәсә диварларында оешуы табигый хәл. Милләте, дине өчен олы мирас калдырган галимнең тормыш юлын һәм эшчәнлеген тирәнтен өйрәнеп, халыкка җиткергән Разия ханым Сәхипова студиябез кунагы.

22 гыйнвар 14.00 сәгатьтә «Милли кунакханә»гә рәхим итегез! Очрашуны безнең ВКонтакте челтәрендәге рәсми биттә карарга мөмкин.