Форма поиска
21 апрель көнне Казанда Россиянең төрле төбәкләреннән һәм чит илләрдән килгән Сабантуйны оештыручылар өчен «Сабантуй халык бәйрәмен оештыру һәм үткәрү методикасы һәм технологиясе» дигән семинар-практикум ачылды. Аны Татарстан Республикасы Мәдәният министрлыгы Бөтендөнья татар конгрессы Башкарма комитеты һәм Татарстанных мәдәният ресурс үзәге белән берлектә оештырды. Семинар үз эшен 24 апрельгә кадәр дәвам итәчәк.
Чараның рәсми ачылышы башкалабызның Габдулла Тукай әдәби музеенда узды. Семинарда катнашучыларны Бөтендөнья татар конгрессы Башкарма комитеты җитәчесе Данис Шакиров сәламләде.
Семинар-практикум ел саен уздырыла һәм катнашучыларның географиясе елдан-ел киңәя бара. Быел чарада Россия Федерациясенең төрле төбәкләерннән 40 кеше катнаша. Семинарда катнашучылар арасында Әстерхан, Волгоград, Киров, Курган, Мәскәү, Түбән Новгород, Омск, Оренбург, Пенза, Ростов, Самар, Свердлау, Төмән, Ульяновск, Чиләбе өлкәләре, Пермь, Красноярск крайлары, Мари иле, Удмуртия, Чувашстан республикалары, Ханты-Манси автоном округы, Луганск халык республикасы вщкиллщре бар.
Семинар кысаларында катнашучылар Сабантуй бәйрәмен оештыруның һәм үткәрүнең төп принциплары, шәһәр мохитендә бәйрәм йолаларын торгызу технологиясе белән танышачаклар, бәйрәмнең уен ярышлары, музыкаль фольклоры, осталар ярминкәсен һәм Сабантуй мәйданчыкларын оештыру тәртибе, шулай ук татар традицион бәйрәм костюмы, татар костюмының классификацияләре, традицион көрәш буенча ярышлар һ.б. турында белем арттыра алачак.
24 апрель көнне семинарда катнашучылар Татарстан Республикасының Кама Тамагы муниципаль районында булачак. Биредә алар татар милли бәйрәменең прологы белән танышып, юка пешерүче буенча остаханәдә катнашырга ниятли. Шулай ук чараны оештыручылар Кама Тамагы районының Тарихны өйрәнү музее, танылган язучы Туфан Миңнуллинның музеена экскурсияләр уздырачак.
Семинар тәмамланганнан соң катнашучыларга сертификатлар һәм квалификация күтәрү турында таныклыклар тапшырылачак.
Башка яңалыклар
13.04.2026
