Форма поиска
3 март көнне Арча Мәдәният йортында район күләмендә үткәрелгән «Барлык кыйммәтләрнең таҗы – гаилә» фестиваль-бәйгенең йомгаклау концерты узды. Гаилә, туганлык җепләрен ныгыту, иҗади гаиләләргә үзләрен күрсәтү өчен мөмкинлек тудыру, аларны мәдәният тормышында катнашырга тарту, җәмгыятьтә гаиләләрнең ролен үстерү уңаеннан оештырылган әлеге бәйге Арча муниципаль районы башлыгы Илшат Нуриев ярдәме белән оештырылды.
Сайлап алу турлары февраль ае дәвамында онлайн-форматта авыл Мәдәният йортларында барды. Чарада барлыгы 53 гаилә катнашты. Катнашучылар «Минем гаиләм» номинациясендә презентация һәм видеороликлар ярдәмендә үз гаиләләре, нәсел агачы – шәҗәрә, милли гореф-гадәтләр, йолалар белән таныштырды, «Иҗади бәйге» номинациясендә үзләренең иҗади яктан сәләтләрен күрсәтте. Шулай ук «Гаиләнең кадерле ядкәрләре» номинациясе аша катнашучыларның кул эшләнмәләре, гаилә ашлары, һәр гаиләдә буыннан-буынга күчеп, кадерләп сакланган ядкәрләр белән танышырга мөмкин булды.
Мәдәният йорты фойесында гаиләләр тарафыннан бик матур һәм бай күргәзмә оештырылган иде. Анда гаиләләрдә кадерләп сакланган ядкәрләр тәкъдим ителде: Коръән китаплары, хатлар, бүләкләр, борынгы киемнәр, фоторәсемнәр, бизәнү әйберләре.
Арча муниципаль районы Башкарма комитетының «Мәдәният идарәсе» муниципаль учреждениясе җитәкчесе Илфар Әюпов сүзләренчә, чарада катнашкан гаиләләр - районыбызның йөзе. Гаиләләр «Шәҗәрә – нәсел тамырыбыз», «Гаиләмнең кадерле ядкәрләре», «Оста кулда һөнәр бар», «Иҗади гаилә» номинацияләрендә бүләкләнде. Төп номинацияләрдә җиңүчеләргә диплом һәм акчалата бүләкләр тапшырылды.
Чара гаиләләрнең концерт номерлары һәм махсус кунак - Татарстанның халык артисты Рәсим Низамов җырлары белән үрелеп барды.
Башка яңалыклар
