Апаста «Тукай әсәрләре буйлап» дип исемләнгән театральләштерелгән әдәби-музыкаль кичә үтте
29.04.2025
Форма поиска
28 апрель Апас мәдәният йортында Татар халкының бөек шагыйре Габдулла Тукайның тууына139 ел тулу уңаеннан «Тукай әсәрләре буйлап» дип исемләнгән театральләштерелгән әдәби-музыкаль кичә узды. Чара Пушкин картасы проекты кысаларында өлкән класслар укучылары өчен оуштырылды.
Бөек шәхес турында күбрәк белгән саен, ул күңелгә якыная, аның иҗаты яңа яктан ачыла бара. Татар халкының кадерле мирасы булган әсәрләр иҗат иткән бөек шагыйрь Габдулла Тукай гомере буе михнәттә, ятимлектә, әти-әни назы күрмичә, газапта яшәгән. Язмыш аны авыр тормыш шартларында кыерсыткан, каккан-суккан...
Сөекле шагыйребезнең әсәрләрен бабаларыбыз ятлаган, әти-әниләребез укып үскән, хәзер без аларны өйрәнәбез, сәхнәләштерәбез. Алар җанны җылыта, күңелне яктырта, туган телгә мәхәббәт тәрбияли.
Тукайның шигыръләре, әкиятләре кечкенәдән белем алырга, эш сөяргә, табигатьне сакларга өнди. Апас мәдәният йортында узган чарада Г. Тукайның «Су анасы», «Шүрәле» әкиятләре, «Бала белән күбәләк», «Эш беткәч уйнарга ярый» әсәрләре күрсәтелде.
«Татар халкы Тукай белән горурлана. Карты да, яше дә Тукайны укый һәм аны олылап искә ала. Бугенге максатыбыз да – сөекле шагыйребез Габдулла Тукай иҗаты аша татар теленең сафлыгын, бөеклеген укучыларыбызга җиткерү, буыннан-буынга тапшыру. Танылган шагыйрь гаҗәеп зур әдәби мирас калдырды, халыкка хезмәт итүнең бөек үрнәген күрсәтте. Кичәбезне Г. Тукай сүзләренә халык иҗат иткән «Туган тел» җыры белән тәмамладык. Бу көй җыр гына булып калмады: ул чын мәгънәсендә татар халкының гимнына әйләнде», ди чараны оештыручылар.
Башка яңалыклар
