Яңа Чишмә районында «Халык җәүһәрләре» татар фольклор сәнгать фестивале үтте

Яңа Чишмә районы Чертуш авылында II районара «Халык җәүһәрләре» татар фольклор сәнгать фестивале узды. Фестивальнең максаты – татар традицион мәдәниятен саклау, талантлы үзешчән коллективларны барлау, аларның иҗат мөмкинлекләрен ачу, халыкка рухи мирасны ирештерү, онытыла барган борынгы йолаларны, халык җырларын саклап калу һәм киләчәк буыннарга җиткерү, тәҗрибә уртаклашу. 

Фестивальнең географиясе дә елдан ел киңәя бара. Беренче фестивальдә берничә район гына катнашса, быел Татарстанның 6 районы (Чистай, Аксубай, Чирмешән, Баулы, Ютазы, Яңа Чишмә) һәм Башкортстаннан фольклор коллективлар килде. 

Фестиваль үз эченә 7 номинацияне ала. Шуларның берсе – мөнәҗәтләр. Әлеге фестивальдә мөнәҗәтләр укучыларның чыгышлары аеруча тәэсирле булды. Чаллы башы авылы мәчетеннән Фәнил хәзрәт исә мөнәҗәтләрнең яңа буынны тәрбияләүдә роле зур булуы турында әйтеп узды. 

Тагын бер номинация – йолалар. Алар үз эченә төрле авыл, төбәкләргә хас гореф-гадәтләрне, жыр-биюләрне ала. Бу номинациядә өч авыл мәдәният йорты чыгыш ясады. Беренче урынны «Печән өсте йоласы» белән Тубылгы тау авылы Мәдәният йорт вәкилләре алды. 

Төрле уен коралларында уйнаучылар да тамашачыларның күңеленә хуш килде. Алар халкыбызның көйләрен уйнап,тамашачыларны ерак үткәннәргә алып барып кайтты. Беренче урынны Чистай районыннан Закиров Салихҗан, Татарстанның атказанган мәдәният хезмәткәре Рәшит Минабетдинов алдылар. Яшьләр арасында беренчелекне Чертуш авылыннан Зарипов Рузил яулады. 

Башкорстастаннан кубызчыларның «Сердәш» инструменталь ансамбле дә беренче урынга лаек булды. Әлеге номинациядә скрипкада уйнаучы Шәйхетдинова Әминә «Туган тел»не уйнап, тамашачылар күңелен яулады. 

Шулай ук әлеге фестивальдә халык һөнәрчелеге осталары күргәзмәсе дә эшләде. Фестиваль түгәрәк уен белән тәмамланды.