Форма поиска
Татар халкында Сабан туе алдыннан уздырыла торган, элек-электән килгән бер матур йола – бирнә-бүләк җыю йоласы бар. Бу йола тарихка тирән тамырланган, ул халыкның бердәмлеген, язны каршылау шатлыгын һәм яңа уңыш елына булган өметләрне чагылдыра.
Шушы көннәрдә бүләк җыю йоласын Әлки районында да үткәрделәр. Аны Әлки район Мәдәният йорты хезмәткәрләре оештырды. Алар үзләренең энергиясе һәм энтузиазмы белән бу традицияне яңартып, аны яшь буынга җиткерергә телиләр.
Район Мәдәният йорты хезмәткәрләре авылны урап, йорттан-йортка йөреп, район халкына Сабан туеның якынлашуы турында хәбәр иттеләр. Бу мизгелләр, чыннан да, күңелгә хуш килде. Авыл халкы, үз чиратында, йолада катнашучыларны җылы кабул итеп, аларга рәхмәтләрен белдерделәр, сабан туена үзләренең бүләкләрен тапшырдылар.
Шулай итеп, халык бирнә-бүләк җыю йоласын акча яки әйбер җыю чарасы гына түгел, ә элеккедән килгән гореф-гадәтләрне, рухи кыйммәтләрне саклау, халыкны берләштерү, яшәү көче бирүче бер матур бәйләнеш булып торуын раслады. Киләчәк буыннар да бу йоланы онытмас, аны яшәтер, дип ышанып кала чараны оештыручылар.
Башка яңалыклар
